Acts 6
Misosovosi'a ta Mitema Muxatele Tamei sou Isu'uline'i ta Mitema sou Xaixai.
1 aNo anu voxovoxo ane ne, no mine 'iti'itisi'a ta mitema ane ane'i mimuxaxu tane'i noxou Iesu muxali ta tatila, la ta Iutaia ane milavusou mivikala no anu vaikala Xiliki no taine'i ne mikalapuu mulai noxi'a ane'i ane milavusou mivikala no anu vaikala Evalaio. Xo no anu voxovoxo sou lavilelusou la'ilali, la ta sema ta vaalu noxi'a ne ino'u lavilelu umomomosi'a uasi. 2La sou ane'i ta aposeli mavulovexa mo mulu'e no lia tamei mipitane'i ta mitema ane ane'i imuxaxu tane'i noxou Iesu mukalusi sou mivikalane'i aloxo 'o, “Anu laixe noxixe uasi sou ta'italonu xaixai sou taa'aloxu vaikala noxou Lataua io tavelunu la'ilali. 3Io ta vivixe, ngasosovosi'a ta mitema muxatele tamei no taingengi ne e ta mitema milavusi'a lexe ane'i mi'ana'ana no anu Uleenu Tavuna mo ane'i ta mitema sou lavulavu laixe kalumo. La sou nenge tamuxaxu xaixai ane ne ulai noxi'a sou isaxila'u. 4Io nexi ta'italonu xavutalamexi no anu lakilaka mo xaixai sou taa'aloxu vaikalasi.”5Xavutala ane ne ane'i la'oluxa'a lololi ne mi'osasou, la ane'i misosovosou Sutepano itema e muxamuxaxu tanu pekia'u mo mu'ana'ana no anu Uleenu Tavuna, xe Pilipi mo Purokorusi mo Nikanolu mo Timoni mo Parumenasi mo Nikolasi sie Antioki e umulinu lalotu noxi'a ta Iutaia. 6Ane'i mitulusi'a ta mitema ane ne no ie'i ta aposeli. La ane'i mikilakasi'a mo mimulaxu avo'a teitexi noxi'a sou mialusi'a.
7 bLa sou vaikala noxou Lataua mutaasou tani. La 'iti'itisi'a ta mitema ane'i ane mimuxaxu tane'i noxou Iesu ne Ielusalemu ne muxali tatila mupaleasi. Mo ta aili'i tavu'alo milomuxu vaikala noxou Lataua sou mimuxaxu tane'i.
Ta Iutaia Mitetelisou Sutepano
8Ioxe Sutepano ne anu mu'ana'ana no anu alauna mo xavi noxou Lataua, la mu'oxonu mii ane talavusou uasi mo sosovo iouiou no taine'i ta mitema. 9Ia ta mitema ta Iutaia miavuti sou mi'oto no anaxa'a mulai noxou Sutepano. Ane'i ne ta mitema sou taasou lalotu ane milemo lexe ta mitema manamana'a. Ane'i ta mitema sie Kilene mo sie Alekisandolia mo no xalee lia tila tamei ne Kilikia xe Asia kalumo. 10 cIa ane'i imomomo sou itulu mo itooxu lavulavu noxou mo Uleenu Tavuna ane anu muvikala no anu ne uasi.11La sou ane'i mitalume sou miavutilixa'a ta mitema mose'i sou lexe ivikala aloxo 'o, “Nexi telomusou Sutepano muvikala la mulemolu vaikala mose'i masua mulai noxou Mosesi mo noxou Lataua.”
12La sou ane'i miavutinoxu la'ia no opone'i ta mitema mo ta tatilasi'a mo ta mitema sou lavulavu no anu lapuloto, la ane'i mitetelisou Sutepano sou mine'e mitulusou no ie'i ta mitema ane mipita sou vaivaikala ne. 13Ane'i mitulusi'a ta mitema sou a'alo kalakalavoi ne sou mivikalane'i aloxo 'o, “Itema ane 'o ne muvikala masua no anu Tani Tavuna mo no anu lapuloto noxou Mosesi. 14Xo nexi telomusou muvikala lexe ‘Iesu e sie Naseleti ne umamulonu Tani Tavuna mo uxiunu 'ili'ilixo ane Mosesi mulosinge.’”
15La ane'i mukalusi ane mixoxolu no anu pitapita ne mimatakisou Sutepano. La ane'i mimaisou lexe iou ne muxali loxo angelo vile noxou Lataua iou.
Copyright information for
ATA